स्वातंत्र्यवीर सावरकर

स्वातंत्र्यवीर विनायक दामोदर सावरकर: ॐ नमोजी आद्या

"झाले बहु, होतील बहु, परंतु या सम हा"

जन्मजात आणि ज्वलंत देशभक्त, सुधारक, साहित्यिक, कवी, नाटककार, इतिहासकार, राजकारणी आणि दार्शनिक अशा विविध पैलूंनी स्वातंत्र्यवीर विनायक दामोदर सावरकर ह्यांचे व्यक्तिमत्त्व बनलेले होते. गेल्या अनेक दशकांच्या उपेक्षेचा आणि अपप्रचाराचा परिणाम म्हणून त्यांचे जीवन-कार्य यथार्थपणे अनेकजणांना माहित नाही. स्वातंत्र्यवीर सावरकरांचे जीवन, विचार आणि कार्य ह्यांना वैश्विक स्तरावर नेणे हा ह्या संकेतस्थळाचा उद्देश आहे.  

  • हिन्दुस्थानच्या स्वातन्त्र्यासाठी आंतरराष्ट्रीय स्तरावर क्रांतिकारक चळवळ संघटित करणारे आद्य क्रांतिवीर
  • दोन देशांच्या सरकारांनी ज्यांच्या ग्रंथावर प्रसिद्धिपूर्वीच प्रतिबन्ध घातला असे जगातील आद्य लेखक
  • हिन्दुस्थानच्या स्वातन्त्र्यलढ्यात भाग घेतला म्हणून ज्यांची पदवी विद्यापीठाने काढून घेतली असे आद्य पदवीधर
  • हिन्दुस्थानच्या स्वातन्त्र्यलढ्यात सहभागी झाल्यामुळे ज्यांना बॅरिस्टर पदवी नाकारण्यात आली असे आद्य विधिज्ञ
  • विदेशी कपड्यांची निर्भयपणाने प्रकट होळी आयोजित करणारे आद्य देशभक्त
  • हिन्दुराष्ट्राच्या सर्वांगीण विकासाच्या दृष्टीने सर्वस्पर्शी विचार करणारे, अस्पृश्यता व जातिभेद यांच्याविरुद्ध बंड पुकारणारे आद्य क्रांतिवीर
  • ब्रिटिश न्यायालयाचा अधिकार नाकारणारे आद्य भारतीय बंडखोर नेते
  • पन्नास वर्षे सीमापारीची काळ्यापाण्याची शिक्षा झालेले आणि ती पुरुन उरल्यानंतर सक्रिय कार्य करणारे जगातील आद्य राजबंदी
  • कारागृहात लेखनसाहित्य न मिळाल्यामुळे काट्याकुट्यांनी कारागृहाच्या भिंतींवर सुमारे दहा सहस्त्र ओळींचे काव्य कोरून लिहिणारे आणि ते सहबंदिवानांकडून मुखोद्गत करवून घेऊन प्रसिद्ध करविणारे जगातील आद्य कवी
  • हेगच्या आंतरराष्ट्रीय न्यायालयात ज्यांची अटक गाजली असे हिन्दुस्थानचे आद्य राजबंदी
  • योगशास्त्राच्या उत्तुंग परंपरेनुसार प्रायोपवेशनाने मृत्युला कवटाळणारे आद्य आणि एकमेव क्रांतिकारक महायोगी